Një 46-vjeçar banues në Tiranë, është arrestuar nga Policia, pasi dyshohet se transportonte lëndë shpërthyese, armë zjarri dhe municion me qëllim shitjen e tyre.
Sipas Policisë, në pranga ka rënë shtetasi Urim Meta, i cili u kap gjatë një kontrolli në rrugën e fshatit Shëngjergj. Gjatë operacionit, në automjetin që ai drejtonte u gjetën dhe u sekuestruan 4 kallëpë tritoli, 2 armë zjarri si dhe 1500 fishekë të kalibrave të ndryshëm.
Hetimet paraprake tregojnë se 46-vjeçari dyshohet se i kishte siguruar armët dhe lëndën shpërthyese në zonën e Shëngjergjit, me qëllim shitjen e tyre në Tiranë, duke ngritur dyshime për përdorimin e mundshëm në veprimtari kriminale.
Në cilësinë e provës materiale, policia ka sekuestruar gjithashtu automjetin dhe celularin e të arrestuarit.
Materialet procedurale iu referuan Prokurorisë së Tiranës, për veprime të mëtejshme.
