Gjykata e Posaçme kundër Korrupsionit dhe Krimit të Organizuar (GJKKO) ka vendosur që të kalojë për gjykim shtatë nga të pandehurit e dosjes “Revanshi”.
Për gjykim kanë kaluar Durim Bami, Aldo Avdyli, Jozi Kraja, Altin Morina, Marklen Haka, Enerigert Mitri dhe Edson Jozëik, të cilët janë të arrestuar, ndërsa dosja për 20 të tjerët, që janë në kërkim, është veçuar.
Në dosjen “Revanshi”, Durim Bami dhe të pandehurit e tjerë akuzohen për një sërë veprash të rënda penale, ku përfshihen sigurimi i kushteve për vrasje, pjesëmarrja në grup të strukturuar kriminal dhe tentativa për atentate.
Akuzat në dosjen “Revanshi”
Durim Bami
Akuzat zyrtare kundër tij janë të rënda si ajo e “Sigurimit të kushteve për të kryer vrasjen” e ish-deputetit të PS, Arben Ndoka, “Sigurimit të kushteve për të kryer vrasjen” të, Hektor alias Tori Xheçuka dhe Erigers Mihasit kryer kjo në formën e “Grupit të strukturuar kriminal”.
Njëherësh, Durim Bami, akuzohet nga SPAK dhe për “Kultivim të lëndëve narkotike” kryer në bashkëpunim në formën e “Grupit të strukturuar kriminal”.
Aldo Avdyli
Akuzohet për “sigurim të kushteve për të kryer vrasjen” ndaj Durim Bamit, një vrasje e mbetur në tentativë. Përveç kësaj, ndaj tij rëndojnë akuza për pjesëmarrje në grup kriminal dhe veprime të tjera të paligjshme.
Marklen Haka, Jozi Kraja, Altin Morina, Enerigert Mitri, Edson Jozwik
Të gjithë këta janë të pandehur për pjesëmarrje në grup të strukturuar kriminal, si dhe për veprime që lidhen me atentate të planifikuara, trafikim armësh dhe veprime të tjera të rënda penale.
Të përfshirë gjithashtu në dosjen “Revanshi”, janë Emiliano Shullazi, Astrit Avdyli, Leonard Duka, Gjergji Cukali me akuza për krime të rënda, duke përfshirë organizimin e atentateve dhe veprime kriminale në kuadër të grupit.
