Nga Boldnews.al
Kryeministri Edi Rama dukshëm i bezdisur nga “procedurat idiote” sipas tij të leximeve të raporteve të PD-së dhe PS-së për imunitetin e Ballukut, mezi priti çastin e votimit dhe pa parë ende rezultatin që e dinte me kohë e vakt, krisi e iku.
Bela e tij nuk iu dorëzua SPAK-ut, ndërsa njëkohësisht sfidoi jo një nga institucionet e reja të drejtësisë, por gjithë aradhën e atyre ndërkombëtarëve që besuan tet “vizioni” i Ramës se do mbështeste një drejtësi të pavarur.
Nuk mund të ishte aspak befasi për vendet e BE-së dhe qendrës së saj në zemër të Brukselit. Edi Rama e kishte paralajmëruar se do të dilte kundër gjithkujt që kërkonte që në duart e “brishta” të Belinda Ballukut të shtrëngoheshin parangat, pavarësisht se mbi të ka akuza që mund të shkojnë deri në 35 vite dënim me burg.
Njeriu që çirrej dhe mbante si etalon të qeverisjes së tij reformën në drejtësi, për të cilën mburrej se e lindi dhe rriti, sot vrau pjellën personale, dhe këtë e beri në formë sfide në sytë e njerëzve që flasin anglisht apo gjermanisht.
Prokuroria Speciale u thërmua nën këmbët e Edi Ramës, ndërsa personazhet që dërgonin në Bruksel raporte dhe deklarata për “arritjet e qeverisë” në proceset e integrimit të Shqipërisë, mbetën të menderosur. Nuk është aspak problem për ta me shpresën se edhe Bela do harrohet pas tre ditësh me turpin që kapërdihet pas një gote vere, shishja e të cilës kushton 33 mijë euro.
Kushdo që është kundër alkoolit, mund të shtyje turpin me “kos” si nënprodukt i qumështit, apo të ridëgjojë deklaratat e Marta Kos, Komisioneres për zgjerim të BE-së. “Po, zgjedhjet kanë qenë të lira dhe të ndershme. Është gjithmonë mirë kur marrim sugjerime për përmirësime dhe kjo është një gjë e mirë për Shqipërinë, por edhe për BE”, deklaroi Kos, në vizitën e fundit dy muaj më parë në Tiranë, kur u pyet për zgjedhjet e 11 Majit të vitit të kaluar.
As vetë Rama nuk u besoi veshëve, por zyrtarucë të tillë që vijnë me pompozitetin e përfaqësuesve të BE-së shijojnë atë kohë në Tiranë nga pritja “madhështore” e qeverisë që përzgjedh këndshëm resteronatet ku drekojnë e darkojnë, apo hotelet ku do bëjnë një sy gjumë. Për ta Shqipëria është ajo që shitet nga zyrtarët që takojnë dhe më pas dërgojnë raporte se qeveria shqiptare po ecën përpara, është partnere e besueshme dhe po bën hapa të mëdha në ndarjen e pushteteve, duke mos u bërë pengesë në sistemin e drejtësisë.
Rasti më i fundit ajo e sfidës, përbuzjes dhe vrasjes publike të “birit SPAK” që cënoi paksa “babain”, është shfaqja e vërtetë që “bosi i Surrelit” me 83 “darë” të Parlamentit, kastruan edhe ndërkombëtarucët e Brukselit për t’i kthyer edhe ata në eunukë që shërbejnë në haremin e “parkut Eden”. Vetëm dy rrugë la, ose të “hanë Kos”, ose të dëgjojnë perzonazhe Brukseliane me të njëtin llagap si nënprodukti i tharutuar i qumështit.
