Gjykata e Shkallës së Parë të Juridiksionit të Përgjithshëm Fier ka shpallur fajtorë dhe ka dënuar me nga 25 vite burgim shtetasit L.H. dhe M.M., të akuzuar për tentativë vrasjeje për hakmarrje.
Vendimi u mor pas kërkesës së Prokurorisë së Fierit, e cila arriti të provojë se të pandehurit kishin bashkëpunuar për të eliminuar fizikisht shtetasin M.H.
Hetimet zbuluan se L.H., me qëllim hakmarrjeje për vrasjen e vëllait të tij R.H., kishte porositur M.M. për të kryer atentatin.
Më 30 mars 2023, rreth orës 16:00, në vendin e quajtur “Pisha” në fshatin Garunjë, Lushnjë, M.M. kishte siguruar një armë zjarri dhe kishte qëlluar njëmbëdhjetë herë drejt automjetit ku udhëtonte shënjestra.
Si pasojë e sulmit, pasagjerja B.S. mbeti e plagosur, ndërsa M.H. arriti të largohej duke shtuar shpejtësinë e mjetit.
Dy të pandehurit u shpallën fajtorë për veprat penale “Vrasja në rrethana cilësuese” në mënyrë të rrezikshme për jetën e shumë personave, e kryer në bashkëpunim dhe mbetur në tentativë, sipas neneve 79, 25 dhe 22 të Kodit Penal, si dhe “Mbajtja pa leje dhe prodhimi i armëve, armëve shpërthyese dhe municionit”, sipas nenit 278/1 të Kodit Penal.
