Kreu i Partisë Demokratike, Sali Berisha, akuzoi nga Foltorja e radhës në Krujë kryeministrin Edi Rama dhe mazhorancën se synonin shuarjen e opozitës përmes marrëveshjeve të fshehta pas zgjedhjeve të 11 majit.
Sipas tij, qëllimi ishte vijimi i “plaçkitjes së shqiptarëve” dhe abuzimeve me tenderët publikë.
Berisha deklaroi se Partia Demokratike do të krijojë një agjenci të posaçme sapo të vijë në pushtet, e cila do të merret me sekuestrimin e pasurive të zyrtarëve të korruptuar dhe kapjen e tyre kudo që të ndodhen.
Në fjalën e tij, kreu i PD-së hodhi akuza të drejtpërdrejta ndaj zv/kryeministres Belinda Balluku dhe kryeministrit Edi Rama për pasuri të pajustifikuara.
“Ua them unë ju, dhe këtë betejë ne do e fitojmë është e drejtë, asgjë s’do na pengojë ne pa u dhënë atë që meritojnë. Janë bërë miliarderë duke vjedhur shqiptarët, kanë zhytur shqiptarët në varfëri, i kanë larguar nga vendi.
Të këqijat që kanë bërë do i paguajnë, beteja e kryengritja jonë është paqësore dhe vetëm paqësore. Ua them unë, siç kapëm Aldo Baret me shokë kudo që ishin fshehur ashtu do kapen edhe këta qeveritarë kudo që të fshihen. Një Agjenci e posaçme do krijohet për konfiskimin e pasurive të tyre.
“300 apartamente Lubia, e imagjinoni juve? Paratë e rrugës aty i merrte kjo për apartamente atje. Dhe dihen vetëm kaq. Po Rama? Ka miliarda! 200 mln kishte vetëm si kryetar bashkie, e denoncoi raporti i OSBE”. – tha ai.
