Një raport i Kombeve të Bashkuara ka zbuluar se presidenti sirian Ahmed al-Sharaa dhe dy ministra të kabinetit të tij kanë qenë shënjestër e pesë tentativave të dështuara për vrasje nga grupi terrorist ISIL gjatë vitit të kaluar.
Raporti, i publikuar nga Zyra e OKB-së për Kundër-Terrorizmin, paralajmëron se grupi po përdor organizata fasadë për të destabilizuar qeverinë tranzitore të Sirisë.
Sipas dokumentit, planet e vrasjes kishin në shënjestër al-Sharaa, ministrin e Brendshëm Anas Hasan Khattab dhe ministrin e Jashtëm Asaad al-Shaibani.
Al Jazeera shkruan se sulmet e dështuara ndodhën në Alepon verior dhe në provincën jugore të Deraa-s. Autorët ishin një grup që e quante veten “Saraya Ansar al-Sunnah”, të cilin ekspertët e kundër-terrorizmit e identifikuan si fasadë të ISIL-it.
Al-Sharaa mori drejtimin e Sirisë në dhjetor 2024, pasi forcat e tij rrëzuan Bashar al-Assadin, duke i dhënë fund një lufte civile 14-vjeçare. Qeveria e tij iu bashkua koalicionit ndërkombëtar kundër ISIL-it në nëntor.
Megjithëse ka humbur bazën territoriale, ISIL ruan rreth 3 mijë luftëtarë në Irak dhe Siri, duke kryer sulme të fshehta kundër forcave të sigurisë. Rrezikshmëria e tyre u dëshmua më 13 dhjetor 2025, kur një pritë pranë Palmyra-s vrau dy ushtarë amerikanë dhe një civil amerikan.
Në përgjigje, presidenti amerikan Donald Trump urdhëroi operacione ushtarake për eliminimin e celulave të ISIL-it në rajon.
Situata e sigurisë është komplikuar nga mijëra të ndaluar të ISIL-it dhe familjet e tyre. Pas një marrëveshjeje armëpushimi me forcat kurde, qeveria siriane mori kontrollin e kampeve al-Hol dhe Roj, ku qëndrojnë mbi 25 mijë e 740 persona. OKB-ja theksoi se mbi 60% e banorëve të kampeve janë fëmijë, duke e kthyer çështjen në një krizë humanitare.
Në fund të janarit, ushtria amerikane filloi transferimin e të ndaluarve të ISIL-it nga Siria në Irak, me autoritetet irakiane që premtuan ndjekje penale për luftëtarët.
