Një 40-vjeçar shqiptar, i shpallur në kërkim nga autoritetet italiane, është arrestuar në Belgjikë në bazë të një urdhër-arresti evropian të lëshuar nga Prokuroria e Përgjithshme e Perugias.
Sipas mediave italiane, ai duhet të vuajë pjesën e mbetur të dënimit prej 4 vite e 11 muaj burg. 40-vjeçari rezultonte i zhdukur që prej qershorit 2025.
Sipas hetimeve, ai ishte pjesë e një organizate kriminale transnacionale të përfshirë në trafik ndërkombëtar droge. Ngjarjet për të cilat është dënuar datojnë që nga viti 2006, kur së bashku me persona të tjerë dyshohet se ka importuar 20 kilogramë heroinë nga Shqipëria në Itali.
Baza operacionale e grupit ishte identifikuar në Pescara dhe në komuna përreth. Sipas autoriteteve, 12 kilogramë heroinë ishin destinuar për tregun e Ravenës, ndërsa 8 kilogramë të tjera dyshohet se do të dërgoheshin jashtë Italisë.
