Një shqiptar është dënuar me 4 vite burg në Gjermani pasi vodhi çanta luksoze me vlerë rreth 530 mijë euro nga banesa e prezantueses dhe modeles holandeze Sylvie Meis në Hamburg.
Ngjarja ndodhi në verën e vitit 2023, kur Meis ndodhej me pushime në Ibiza. Hajdutët, të cilët sipas policisë ishin pjesë e një grupi nga Shqipëria, hynë me forcë në apartamentin e saj në katin e pestë dhe morën 22 çanta luksoze.
I dënuari është identifikuar si Ermal M., 42 vjeç, i cili u arrestua dhe u përball me drejtësinë gjermane.
Sylvie Meis ishte e pranishme në seancën gjyqësore dhe dëshmoi për pasojat psikologjike që i shkaktoi ngjarja, duke theksuar se ende ndjen frikë të qëndrojë në shtëpi.
