Kryedemokrati, Sali Berisha ka mbërritur në protestën e thirrur këtë pasdite nga vetë PD, te Kryeministria, ku kërkohet largimi i Edi Ramës.
Ai është nisur nga Selia Blu dhe u është bashkuar dhjetëra mbështetësve të cilët janë mbledhur në shesh.
Ndërkohë sipas raportimeve në protestën e sotme do të jenë gjashtë përfaqësues që do të marrin fjalën, pesë prej të cilëve janë zbuluar.
Ata janë Ilir Alimehmeti, nënkryetari i Kuvendit Agron Gjekmarkaj, Jonathan Pano, Desada Xhetani nga FRPD dhe fjalën përmbyllëse do ta ketë kryetari i PD, Sali Berisha.
Deri më tani protesta paraqitet paqësore, nuk janë raportuar incidente serioze, ndërkohë 1300 efektivë policie janë angazhuar në terren, të pajisur me maska kundragaz , ndërsa janë vendosur edhe autobotë me ujë.
