Policia e Beratit ka arrestuar një 40-vjeçar, i cili shiste lëndë narkotike në doza.
Ai u kap teksa lëvizte me makinë në aksin rrugor Dimal–Kuçovë. Gjatë kontrollit të automjetit, policia gjeti sasi kokaine dhe kanabisi, të cilat dyshohet se ishin për shitje.
Në makinë ndodhej edhe një 28-vjeçar, i cili do të hetohet në gjendje të lirë.
“Si rezultat i administrimit të shpejtë të informacioneve të siguruara në rrugë operative, se 2 shtetas lëviznin me automjet, në aksin rrugor “Dimal-Kuçovë”, për të shitur lëndë narkotike, shërbimet e Drejtorisë Vendore të Policisë Berat mundësuan lokalizimin dhe ndalimin e automjetit të dyshuar, me drejtues shtetasin N. Ç., 40 vjeç dhe pasagjer shtetasin K. Q., 28 vjeç.
Nga kontrolli në këtë automjet u gjetën sasi të lëndëve narkotike Kokainë dhe Cannabis Sativa, të cilat dyshohet se posedoheshin me qëllim shitjen nga 2 shtetasit.
Në përfundim të veprimeve procedurale për rastin, 40-vjeçari u arrestua në flagrancë, ndërsa 28-vjeçari u procedua në gjendje të lirë, për veprën penale “Prodhimi dhe shitja e narkotikëve”, njoftoi sot policia.
