Një ngjarje e pazakontë është regjistruar në Spitalin Rajonal të Lezhës, ku një 54-vjeçar, i paraqitur për të marrë ndihmë mjekësore, dyshohet se ka shkaktuar një shkrepje të pavullnetshme të një arme zjarri pasi ajo i ka rënë nga çanta.
Sipas Policisë, shtetasi me iniciale G. N., 54 vjeç, kishte shkuar në spital për shkak të problemeve shëndetësore. Gjatë qëndrimit në ambientet e spitalit, dyshohet se nga çanta e krahut i ka rënë një armë zjarri, e dyshuar pistoletë, e cila është shkrepur aksidentalisht.
Në përfundim të veprimeve të para hetimore, 54-vjeçari është proceduar penalisht në gjendje të lirë.
Ndërkohë, policia ka shpallur në kërkim djalin e tij, 18 vjeç, pasi dyshohet se ka fshehur armën e zjarrit me qëllim pengimin e zbulimit të së vërtetës.
Po ashtu, është proceduar penalisht në gjendje të lirë edhe një punonjës i Spitalit Rajonal të Lezhës, me detyrë punonjës IT, shtetasi A. V., 54 vjeç, pasi dyshohet se ka kryer veprime që kanë penguar zbardhjen e plotë të ngjarjes.
Grupi hetimor vijon punën për sqarimin e plotë të rrethanave dhe dokumentimin ligjor të rastit.
