Policia italiane ka finalizuar pasditen e djeshme një operacion antidrogë në qytetin e Bergamos dhe në provincë, duke çuar në arrestimin e dy personave dhe sekuestrimin e mbi 70 kilogramëve hashash, si dhe një shume të konsiderueshme parash.
Sipas mediave të huaja, operacioni është pjesë e një plani më të gjerë kontrollesh të synuara për goditjen e trafikut të lëndëve narkotike në territor. Gjatë një shërbimi vëzhgimi, oficerët e Skuadrës Mobile vunë re në zonën e Mozzos një automjet që kryente manovra të dyshimta. Një burrë u pa teksa transferonte me shpejtësi çanta të mëdha nga një makinë në një tjetër, e cila më pas u largua.
Policia ndërhyri menjëherë duke ndjekur automjetin që transportonte ngarkesën dhe e ndaloi pak para hyrjes në autostradë. Në mjet ndodhej një shtetas shqiptar; kontrolli i automjetit çoi në zbulimin e rreth 40 kilogramëve hashash dhe 500 eurove cash.
Paralelisht, një ekip tjetër policor ndaloi automjetin e dytë pranë zonës së Curnos. Drejtuesi i mjetit, një shtetas rumun, po kthehej në banesën e tij. Gjatë kontrollit në banesë, u sekuestruan edhe rreth 30 kilogramë të tjerë hashash, 78 mijë euro para të gatshme, si dhe materiale të përdorura për paketimin e drogës.
Lënda narkotike dhe paratë u sekuestruan dhe iu vunë në dispozicion autoriteteve gjyqësore. Të dy të arrestuarit u transferuan në burgun e Bergamos.
