Detaje të reja janë zbardhur nga atentati i mbrëmjes së së dielës në Rrilë të Lezhës, ku një berberhane u qëllua me breshëri armësh zjarri, duke mbetur i plagosur pronari i saj, 30-vjeçari Sokol Daci.
Shënjestra e atentatit dyshohet të ketë qenë 21-vjeçari Merando Nikulaj, i cili ndodhej në berberhane në shoqërinë e një efektivi të Policisë së Shtetit, Besart Kovaçi, i ndaluar tashmë për veprën penale “moskallëzim krimi”.
Nga verifikimet rezulton se në armën e punonjësit të policisë janë gjetur 15 fishekë, ndërsa në pistoletë kanë mbetur vetëm 5, pra ka qëlluar 10 herë.
Në vendngjarje janë gjetur gjithsej 16 gëzhoja pistolete, 10 prej të cilave të qëlluara dhe 5 në krehër, që dyshohet se i përkasin armës së policit.
Një gëzhojë tjetër ka ngritur dyshime për përdorimin e një arme të dytë nga brenda ambientit, ndërsa sipas raportimeve hetuesit dyshojnë edhe për ekzistencën e një arme të tretë, për të cilën kanë nisur hetimet.
Pamjet e kamerave të sigurisë kanë fiksuar dy automjete tip “Audi” dhe “Passat”, të cilat ndalojnë pranë berberhanes. Nga to zbresin 7 persona, dy prej të cilëve të armatosur me kallashnikov. Në drejtim të lokalit janë qëlluar mbi 30 plumba.
Tre prej plumbave kanë plagosur pronarin e berberhanes, Sokol Dacin, i cili ndodhet në spital jashtë rrezikut për jetën.
Gjithashtu dyshohet se edhe Merando Nikulaj ka mbetur i plagosur, pasi në pamjet filmike ai shihet duke u larguar me vështirësi nga vendngjarja. Megjithatë, sipas raportimeve të deri tanishme nga kontrollet në spitale dhe klinika private nuk është konstatuar që ai të ketë shkuar për ndihmë mjeksore.
