Shqipëria është përmendur në dokumentet e publikuara së fundmi të dosjes “Epstein”, pas zbardhjes së një komunikimi me email mes ish-Sekretarit të Përgjithshëm të Këshillit të Europës, Thorbjon Jagland, dhe financierit amerikan Jeffrey Epstein.
Mesazhi është dërguar vetëm një ditë pas një vizite zyrtare të Jagland në Tiranë. E-mail i datës 25 maj 2012 tregon se Thorbjorn Jagland, në atë kohë Sekretar i Përgjithshëm i Këshilli i Europës, i ka dërguar një mesazh Jeffrey Epstein, ku shkruan shkurt: “Kam qenë në Tiranë, vajza të jashtëzakonshme”.
E-maili është dërguar më 25 maj 2012, ndërsa vizita zyrtare e Jagland në Shqipëri ishte zhvilluar më 24 maj 2012, sipas axhendave dhe burimeve publike.
Sipas arkivave zyrtare, gjatë qëndrimit në Tiranë, Jagland zhvilloi takime institucionale me drejtuesit më të lartë të shtetit shqiptar, përfshirë ministrin e Jashtëm të asaj kohe Edmond Haxhinasto, kryeministrin Sali Berisha dhe Presidentin e Republikës Bamir Topi. Vizita ishte pjesë e angazhimeve zyrtare të Këshillit të Europës në Shqipëri.
Thorbjorn Jagland ka shërbyer si Sekretar i Përgjithshëm i Këshillit të Europës, institucion paneuropian që mbikëqyr demokracinë, të drejtat e njeriut dhe shtetin e së drejtës në 47 vende. Ai ka qenë gjithashtu ish-kryeministër dhe ish-ministër i Jashtëm i Norvegjisë.
Skandali i Jeffrey Epstein lidhet me akuzat për trafikim dhe shfrytëzim seksual të të miturve, për të cilat ai u arrestua në vitin 2019 në Shtetet e Bashkuara.
Epstein u akuzua se kishte krijuar për vite me radhë një rrjet abuzimi, ku përfshiheshin vajza të reja, dhe se kishte lidhje me figura të njohura nga politika, biznesi dhe bota akademike. Ai vdiq në burg në rrethana të diskutueshme përpara se të dilte në gjyq.
