Policia ka arrestuar shoferin 32-vjeçar i automjetit që doli nga rruga dhe ra nga ura në liqen, në aksin Mjedë-Spathar në Shkodër.
Aksidenti u shënua të mërkurën, ku brenda automjetit ndodheshin tre persona, të cilët arritën të shpëtonin mrekullisht. Policia thotë se 32-vjeçari ka humbur kontrollin e mjetit, është përplasur me barrierat metalike të urës së Spatharit dhe ka rënë në liqenin e Vaut të Dejës.
Drejtuesi i mjetit dhe njëri pasagjer ndodhen në spitalin e Shkodrës, ndërsa personi tjetër është dërguar për mjekim më të specializuar te Trauma.
“Në vijim të informacionit paraprak të dhënë dje, për aksidentin e ndodhur në aksin rrugor “Mjedë-Spathar”, informojmë se specialistët e qarkullimit rrugor arrestuan në flagrancë shtetasin Z. B., 32 vjeç, pasi duke drejtuar automjetin, ka humbur kontrollin dhe si pasojë automjeti është përplasur me barrierat metalike të urës së Spatharit dhe ka rënë në liqenin e Vaut të Dejës. Drejtuesi i automjetit dhe pasagjeri, shtetasi N. Ç., 24 vjeç, banues në Laç, po marrin mjekim në Spitalin Rajonal Shkodër, ndërsa pasagjeri tjetër, shtetasi A. N., 22 vjeç, banues në Laç, u dërgua për mjekim të specializuar në Spitalin e Traumës.”, njofton policia.
