Presidenti i Shteteve të Bashkuara, Donald Trump, ka marrë raporte të shumta nga agjencitë amerikane të inteligjencës që tregojnë se pozicioni i qeverisë iraniane po dobësohet ndjeshëm, raportoi New York Times, duke cituar burime të njohura me çështjen. Sipas këtyre raporteve, kontrolli i pushtetit nga autoritetet iraniane ndodhet në nivelin më të ulët që nga përmbysja e Shahut gjatë Revolucionit Islamik të vitit 1979. Protestat që shpërthyen në fund të vitit të kaluar kanë tronditur themelet e regjimit, veçanërisht pasi ato u përhapën edhe në zona që më parë konsideroheshin bastione të mbështetjes për udhëheqësin suprem, Ajatollah Ali Khamenei.
Edhe pse protestat janë zbehur, raportet e inteligjencës theksojnë se qeveria iraniane vazhdon të jetë në një pozicion të brishtë, kryesisht për shkak të gjendjes së rëndë ekonomike. Vështirësitë financiare nxitën protesta sporadike në fund të dhjetorit, të cilat u përshkallëzuan në janar. Autoritetet iraniane, sipas burimeve, kishin pak mundësi për të lehtësuar barrën ekonomike të familjeve dhe reaguan me masa represive, duke larguar më tej segmente të gjera të shoqërisë.
Trump informohet vazhdimisht
Shtëpia e Bardhë konfirmoi se presidenti Trump po informohet rregullisht për zhvillimet. “Presidenti Trump informohet vazhdimisht për çështjet e inteligjencës në mbarë botën. Lidhur me Iranin, ai vazhdon ta monitorojë situatën nga afër”, deklaroi sekretarja e shtypit e Shtëpisë së Bardhë, Caroline Levitt.
Trump ka paralajmëruar mundësinë e një sulmi ndaj Iranit, por brenda administratës ekzistojnë mendime të ndara për efektivitetin e një veprimi të tillë, veçanërisht nëse ai do të ishte simbolik dhe i kufizuar. Sipas New York Times, kryeministri izraelit Benjamin Netanyahu i ka kërkuar Trumpit të shtyjë çdo veprim ushtarak. Nga ana tjetër, disa këshilltarë dhe aleatë të presidentit amerikan e shohin situatën si një “mundësi të artë” për të rrëzuar regjimin iranian. Senatori republikan Lindsey Graham tha se pret që Trump të përmbushë premtimin për të mbështetur protestuesit iranianë. “Qëllimi është t’i jepet fund regjimit”, deklaroi ai.
Përforcim i forcave ushtarake amerikane
Ndërkohë, Shtetet e Bashkuara po përforcojnë praninë e tyre ushtarake në Lindjen e Mesme. Aeroplanmbajtësja Abraham Lincoln, e shoqëruar nga tre anije luftarake të pajisura me raketa Tomahawk, ka hyrë në zonën e përgjegjësisë së Komandës Qendrore të SHBA-së. Në rast të një urdhri nga Shtëpia e Bardhë, forcat detare mund të veprojnë brenda një ose dy ditësh.
Pentagoni ka dërguar gjithashtu 12 avionë luftarakë shtesë F-15E, si dhe sisteme mbrojtëse Patriot dhe THAAD, për të mbrojtur trupat amerikane nga një hakmarrje e mundshme iraniane. Bombarduesit me rreze të gjatë veprimi mbeten në gatishmëri të lartë.
Paralajmërime dhe konsultime rajonale
Zyrtarët amerikanë kanë intensifikuar konsultimet me aleatët në rajon. Admirali Brad Cooper, komandant i Komandës Qendrore të SHBA-së, vizitoi Sirinë, Irakun dhe Izraelin, duke përcjellë edhe një mesazh të qartë për autoritetet irakiane: çdo sulm i milicive shiite ndaj forcave amerikane do të përballet me hakmarrje. Administrata Trump ka zhvilluar gjithashtu bisedime me Arabinë Saudite dhe Katarin, në kuadër të koordinimit rajonal për situatën në Iran.
