Detaje të reja kanë dalë në dritë nga vrasja e taksistit shqiptar, Marko Beka, ngjarje e ndodhur më 23 janar në Gell të Belgjikës.
Sipas mediave të huaja, janë arrestuar dy persona të dyshuar si autorë të ngjarjes, përkatësisht 20 dhe 24 vjeç, emrat e të cilëve ende nuk bëhen me dije.
Vrasja ndodhi të premten në mbrëmje rreth orës 21:00 në Larum, një fshat i vogël i Geel-it në rajonin e Kempenit, ku shqiptari u gjet nga shërbimet e policisë, i vrarë me armë zjarri, ndërsa rrethanat e rastit vijojnë të jenë mister.
Sipas raportimeve, ai u gjet pa shenja jete jo shumë larg automjetit të tij. Ai punonte si shofer taksie ndërsa ishte baba i tre fëmijëve.
Mësohet se lidhur me ngjarjen janë kryer edhe disa kontrolle banesash si dhe janë marrë në pyetje disa persona.
Sakaq dy autorët e dyshuar të arrestuar tashmë, do të dalin para dhomës së këshillimit, e cila do të vendosë për vazhdimin e paraburgimit të tyre.
“Në këtë moment ende nuk është e qartë se kush e ka qëlluar plumbin fatal dhe cili ka qenë motivi i të shtënave”, deklaron prokuroria belge.
