Forcat e policisë së Emirateve të Bashkuara Arabe kanë arrestuar një shtetas shqiptar 39-vjeçar, i shpallur në kërkim ndërkombëtar që prej vitit 2019, i përfshirë në një rrjet të trafikut ndërkombëtar të drogës.
Shqiptari është arrestuar me qëllim ekstradimi drejt Italisë, pasi ishte dënuar atje me 8 vjet e 7 muaj burg për pjesëmarrje në organizatë kriminale me qëllim trafikimin e lëndëve narkotike dhe shpërndarjen e drogës.
Sipas hetimeve, 39-vjeçari ishte kreu i një rrjeti kriminal me bazë operative në rajonin e Venetos. Organizata merrej me importimin e kokainës dhe marijuanës nga Holanda dhe Shqipëria, të cilat shpërndaheshin më pas në Venecia dhe në disa qytete të tjera të provincës, përfshirë Mestre, Scorzè, Noventa di Piave dhe Jesolo.
Shqiptari rezultonte gjithashtu përgjegjës për menaxhimin e kanaleve ndërkombëtare të furnizimit me lëndë narkotike, duke përdorur një strukturë të organizuar dhe mjete të sofistikuara komunikimi.
Nga hetimet rezultoi se gjatë periudhës së festave të Krishtlindjeve, familjarët kishin udhëtuar drejt Dubait për ta takuar, duke përfituar nga një rrjet i gjerë ndihmësish që lehtësonin lëvizjet e tij mes Shqipërisë dhe Emirateve të Bashkuara Arabe. Nga lëvizjes e familjarëve, policia ka gjurmuar dhe ka lokalizuar të riun shqiptar.
Tashmë autoritetet italiane pritet të ndjekin procedurat për ekstradimin e tij drejt Italisë, ku do të vuajë dënimin e dhënë nga drejtësia.
