Nga Boldnews.al
Në vend të stetoskopit, mjeku dhe njëkohësisht shefi i Repartit të Reanimacionit Qëndror në QSUNT vendosi të merrte në duar “pincat e elektriçistit”, në një reagim të paprecedent, duke justifikuar shkëputjen e energjisë elektrike për më shumë se një orë në spital. “Vendosëm që të transportojmë vetëm 9 të sëmurë, të cilët ishin në respiracion të drejtuar. Ne kemi mjetet që transporti i tyre të realizohet më respiratorë portativë pa u cënuar shërbimi. Transporti ishte i shkurtër”, tha Krenar Lilaj.
Ndërsa shefi e relativizon problemin, duke thënë se nuk u cënua jeta e pacientëve, pamjet e publikuara nga të afërm të pacientëve tregojnë tjetër situatë. Infermierët u detyruan të mbanin me “pompa mekanike” të oksigjenimit pacientët që duhet të ishin në aparatura intubimi. “Është vetëm 20 metra larg”-tha mjeku Krenar, i cili sot më së paku nuk do duhej të përshfaqej në media për të relativizuar atë situatë kaotike dhe të rrezikshme.
Me përgjeshmërinë e mjekut, por edhe shefit të pavionit do të duhej të “shqyente” dyert e drejtorisë së QSUNT-së dhe kërkonte llogari se përse nuk janë vënë në funksion gjeneratorët.
Mungesa e energjisë elektrike për pacientë në gjendje të rëndë reanimimi është fatale, por një ditë më pas pritej justifikimi i përhershëm i burokratëve zyrtarë të QSUNT-së, por jo bluzat e bardha të vishinin uniformën e rilindjes. Në atë situatë të rëndë vetë Krenari duhet të kthehej me urgjencë kudo që të ndodhej dhe jo të priste dritën e diellit për të bërë klizmën e shtetit të zënë kaps.
Sot ai foli sesi pajisjet nuk u ndalën në asnjë moment së funksionuari as në reanimacionin qendror, pasi sipas tij ato kanë backup (UPS-bateri) dhe mund të rezistojnë deri në 6 orë pa energji elektrike, kur janë të reja. Gjithçka paska qenë në rregull sipas tij, atëherë përse pacientët në rrezik u transferuan si në kohë lufte?
Për këtë duhet të dilte mjeku Lilaj sot para medias dhe nëpërmjet tyre në komunikim me publikun, ku minimalisht të kërkonte ndjesë për shqetësimin tërësisht të panevojshëm dhe jo të kthehej në “gjenerator propaganda” i pushtetit.
LEXO EDHE:
Vdekja e të dënuarit në QSUT/ Shefi i Reanimacionit: Mungesa e dritave nuk cënoi jetën e pacientëve
