Detaje të reja dalin në dritë për vrasjen e shqiptarit Jani Aliaj, i cili u ekzekutua me thikë të hënën pasdite brenda burgut të Korydallos në Greqi.
Sipas autoriteteve greke, autori i dyshuar i krimit është një 28-vjeçar grek, i njohur për përfshirje në vrasje me pagesë. Policia bën me dije se bëhet fjalë për të njëjtin person që më 18 gusht 2025 vrau 47-vjeçarin nga Gjirokastra, Artur Bashimi, në zonën e Agios Panteleimonas në Athinë.
Ngjarja e vitit 2025 ndodhi me armë zjarri, ndërsa Bashimi, ish i dënuar për vjedhje, dyshohet se u vra si akt hakmarrjeje për vëllanë e tij, Marsel Bashimi, i përfshirë në ngjarje të rënda kriminale në Greqi, përfshirë bashkëpunime me Bledar Jambelli dhe Kristaq Leci, të kërkuar në Shqipëri për vrasjen e komisarit Artan Cuku.
Sipas mediave greke dyshohet se edhe vrasja e Jani Aliajt ka qenë e porositur.
