Nga Boldnews.al
I mbytur nga zullumet e llumshme të hajnisë të qeverisjes në formë dhe ide të qeverisë së tij, kryeministri Edi Rama nuk ka qoftë edhe një zë të vetëm kundër brenda strukturave të PS-së. Të paktën publikisht! Shumë prej tyre, Rilindas të zhgënjyer a socialistë të hershëm të anashkaluar, nën zë apo në tavolina kur flasin lirshëm shprehen se: Rama e ka qelbur me korrupsionin, po qeveris me krimin dhe po tregohet naiv në diplomaci, deri në rrezik, veçanërisht ndaj SHBA-ve.
Këtë mendim kanë edhe një pjesë e deputetëve, apo ish-deputetëve që u firuan rrugës, madje u përbuzën dhe fyen pikërisht nga ministra e drejtorë të rëndësishëm që sot përçapen dyerve të drejtësisë, teksa u publikohen komunikime dhe afera më të ndyra se vetë e ndyra.
Po përse nuk flasin? Përse nuk mbledhin strukturat dhe të kërkojnë llogari për këtë batërdi? Përgjigjia e parë që të vjen vrik është se ata/ato drejtues të PS-së, deputetë, ish-deputetë apo ish-ministra të lënë në hije, nuk kanë aq moral sa të thonë disa të vërteta. Së dyti, ata/ato kanë frikë të shprehen, duke mbajtur radhën dhe bërë “stazhin politik” në pritje të ndonjë kocke të hedhur nga shefi i madh.
Të gjithë kanë vendosur të presin fundin e ciklit Rama. Në momentin e rënies, Ramën do e hanë të tijët, pikërisht ata që me zë të ulët mes tyre thonë se qelbi është trashur në gangrenën qeverisje. Grupe të mëdha socialistësh a rilindasisht të zhgënjyer në momentin e shkarjes së Ramës do të flasin për moral. Do ia bëjnë gjyqin ish-udhëheqësit deri në vendimin e “varjes politike” dhe shëtitjes së “trupit pa pushtet” nëpër vend, me gjoja moralistë të majtë që pështynë mbi atë që deri dje e lëpinin.
Partia mëmë ishte me parimin që: “bar do hamë dhe parimet nuk i shkelim”. E kishin fjalën për idealet komuniste, për të mos lëshuar asgjë dhe pranonin të përtypnin bar duke mos ia “shtrirë dorën armikut”-dmth vendeve të botës Perëndimore. Sociliastët e sotëm kanë humbur edhe “idealet” qofshin idiote që kishin baballarët e tyre. Sot, në vend të barit për të mbajtur frymën gjallë, po përtypin turpin.
Humbja e moralit duket se ka qenë kosto e të gjithë atyre që vendosën t’ia dhurojnë liderit dhe tashmë nuk kanë mundësi as ta rimarrin, pasi blerësi ua flaku… Morali nuk rritet në moçalin Rilindas i cili tashme kalbi veten, por i la vendit pasoja që do duhen dekada për të risjellë sadopak normalitetin.
