Në vazhdën e reagimeve për letrën e presidentit Trump për Bordin e Paqes, kryeministri Edi Rama ka sulmuar mediat për raportimet e tyre, duke i akuzuar për manipulim dhe dezinformim.
Ndërkohë që në media, mëngjesin e sotëm, qarkulloi një artikull i Bloomberg, i cili theksonte se anëtarësimi në Bordin e Paqes kërkon 1 miliard dollarë, Rama ka reaguar ashpër, duke deklaruar se Shqipëria nuk do të paguajë për t’u anëtarësuar.
Po ashtu, kryeministri ka përgënjeshtruar edhe raportimet dhe deklaratat e opozitës, sipas të cilave në Bord janë ftuar të gjitha shtetet anëtare të OKB-së. Ndërkohë, në mediat ndërkombëtare është raportuar se ftesën e kanë marrë vetëm rreth 60 vende.
Reagimi i kryeministrit Edi Rama:
Tenxheret politike mediatike po bubullojnë e gërrgërrojnë aq fort sa thua se në Bordin e Paqes së Presidentit Trump nuk është ftuar Shqipëria, po një vend armik i Shqipërisë! Në Bordin e Paqes janë ftuar të gjitha shtetet e OKB GËNJESHTËR Shqipëria do të paguajë 1 miliardë EURO GËNJESHTËR Palestinezët do të vijnë në Shqipëri GËNJESHTËR E vërteta është shumë e thjeshtë se sa ç’pjell, sidomos në çdo rast kur nderohet Shqipëria, mllefi i injorancës dhe inati i ligësisë: Tenxheret politike e mediatike të mexhelisit tonë janë teneqera të zhurshmshme Shqipërisë së vjetër, ndërsa kjo që po vazhdojmë të ndërtojmë me shumë mund e këmbëngulje të madhe është një Shqipëri Tjetër, e dinjitetshme ndërkombëtarisht dhe e respektuar botërisht. Sa për mua personalisht, rëndësi ka vetëm besimi i shumicës së shqiptarëve, që më kanë ngjitur e mbajtur katër herë në majën e shtetit shqiptar dhe respekti i atyre që janë në majat e botës a të Europës, i cili më duhet mbi të gjitha për të nderuar e lartësuar Shqipërinë. Ky është një moment i jashtëzakonshëm i Shqipërisë, ku tërbimi i tenxhereve thjesht na siguron se sa më shumë lehin qentë, aq më përpara është duke shkuar karvani
