Nga Boldnews.al
Me plot interes, publiku po ndiqte reportimet e “institucioneve publike të pavarura” në Parlament dhe një prej tyre, shumë i rëndësishëm, që prek drejtëpërdrejtë çmimet dhe cilësinë e produkteve dhe shërbimeve, është Autoriteti i Konkurrencës. Priteshin të dhëna sesi ky institucion ka luftuar monopolet dhe oligopolet në vend, priteshin të dëgjoheshin shifra të llahtarshme gjobash për shkelësit dhe nisje të hetimeve për shkeljet e rënda, por ndodhi një hata e madhe.
Nevojtorja ishte halli i Autoritetit të Konkurrencës. Kryetari Denar Biba, ish-kreu i KQZ-së, i përfshirë edhe në një audiopërgjim që kërkonte ndikim në Gjykatën e Strasburgut që qeveria të mos ndëshkohej për pronat, që si moto personale kishte që të gjendej gjithnjë në stacion për të kapur “trenin e Rilindjes”, paraqiti si kërkesë kryesore, një godinë të re për autoritetin.
“Ne jemi në kushtet edhe të problematikave të higjienës. 35 zonja që shkojnë në një tualet, është banale që po e them, por ka ardhur momenti për ta thënë se nuk mban më. Nuk ka arkiva, në ambientet ku bëjmë mbledhje përdoret për arkivë. Muret janë plot me dosje, që nuk duhen mbajtur ashtu, por nuk kemi ku ti mbajmë”, tha ndër të tjera Biba, duke justifikuar kërkesën e tij për më shumë fonde nga qeveria për një ndërtesë të re me shumë nevojtore dhe kushte komode.
Po çfarë ka bërë Autoriteti i Konkurrencës? “Qëllimi i ligjit është mbrojtja e konkurrencës së lirë dhe efektive në treg, si një e mirë publike”- thuhet në përkufizimin e këtij institucioni. Për vitin 2024, Autoriteti i Konkurrencës me 49 punonjës, prej të cilëve me “diskriminim pozitiv”, përbëhet nga 35 zonja, kanë kryer vetëm 11 monitorime dhe 8 procedura hetimore.
Në të gjitha rastet, ky autoritet nuk ka dalë me ndëshkime me gjobë, apo propozime për hetime penale për kompani, subjekte tregtare, apo grupime tregtare që përcaktojnë çmime larg konkurrencës së ndershme. Vetëm në dy raste kanë propozuar gjobë, në gjashtë të tjera kanë lënë rekomandime ndërsa cilësojnë se për çështjet e tjera të hapura: “nuk janë gjetur shkelje”.
Ndër të tjera, Autoriteti në raport për vitin e kaluar shprehet se ka hetuar për çmimin, peshën dhe cilësinë e bukës, për tregjet e fruta-perimeve nën dyshimin e rritjes së çmimeve nga prodhuesit tek shpërndarësit e mëdhenj, për tregun e shërbimit taksi, për sigurimin e detyruar nga kompanitë e sigurimit etj, por në fund nuk ka ndëshkuar askënd, madje shpesh duke dalë edhe në përfundime se nuk ka dominim të tregut dhe konkurrenca është e ndershme. Pritet më shumë interes raportimi në Parlament në vitin e ardhshëm. A janë ndërtuar nevojtore të tjera për Autoritetin e Konkurrencës?
