Ka nisur protesta e Partisë Demokratike përpara Kryeministrisë. Në fjalën e tij, deputeti i PD-së, Belind Këlliçi, u shpreh se mbledhja e opozitës dhe qytetarëve në shesh përfaqëson, sipas tij, një përgjigje ndaj qeverisjes aktuale.
Në vijim, Këlliçi u shpreh se, sipas tij, persona që kanë ndikuar në blerjen e votave në zgjedhje tashmë po përballen me drejtësinë, ndërsa shtoi se edhe figura të tjera të larta të pushtetit do të përballen me hetime.
Ai gjithashtu i bëri thirrje Edi Ramës që të japë dorëheqjen nga posti i kryeministrit, teksa shtoi se qeveria e tij largoi nga vendi plotë 1.1 milionë shqiptarë.
Belind Këlliçi: Ndizni dritat e telefonave ta shohin ku është populli opozitar, ku është PD. Ne sot nuk jemi mbledhur për një ritual politik por si misionarë dhe për të thënë të vërtetën. Ky pushtet ka mbaruar, Edi Rama duhet të japë dorëheqjen tani, jo kur të dojë ai.
Këtu pas shpinës time, hyjnë e dalin nga kjo godinë për të zhdukur provat. Visi ka ruajtur mesazhet e Ballukut, Balluku ka ruajtur mesazhet e palloshit kurse Gysi i ka filmuar të gjithë.
Edi Rama nuk di më kë të mbrojë e kë të lëshojë.
Mekanizmi përbindshëm ka rënë. Makineria e tyre u mbajt gjallë mbi frikën.
Miliarda euro të zhdukura nga xhepat tanë. Kjo bandë detyroi të ikin 1.1 mln shqiptarë.
