Një 22-vjeçar shqiptar është arrestuar në zonën e Cesenës, në Itali, pasi dyshohet se ishte pjesë e një rrjeti të trafikut dhe shpërndarjes së kokainës.
Sipas mediave italiane hetimet nisën pas lëvizjeve të dyshimta që i riu kryente me automjetin e tij, çka çoi në kontrolle të shtuara në zonë.
Gjatë kontrollit të makinës, e cila rezultoi në përdorim nga një person me precedentë penalë, u gjetën rreth 150 gramë kokainë, e ndarë në doza, e fshehur brenda panelit të kontrollit të mjetit. Po ashtu, u sekuestruan pajisje të përdorura për paketimin e lëndës narkotike.
Kontrollet u zgjeruan edhe në banesën e 22-vjeçarit, ku u gjetën materiale të tjera që dyshohet se përdoreshin për përgatitjen dhe shpërndarjen e dozave të drogës. E gjithë lënda narkotike dhe sendet e sekuestruara u morën si prova materiale.
