Një 31-vjeçar shqiptar, i shpallur në kërkim është arrestuar nga Policia në Malin e Zi, pasi akuzohet për kultivim të lëndëve narkotike.
Sipas Policisë, bëhet fjalë për shtetasin, Megiljan Deda, ndaj të cilit Gjykata e Lezhës ka caktuar masën e sigurisë “Arrest në burg”, për veprën penale “Kultivimi i bimëve narkotike”, kryer në bashkëpunim.
Megiljan Deda akuzohet se ka kultivuar, në bashkëpunim me shtetas të tjerë mijëra bimë narkotike në fshatrat Gocaj dhe Rraboshtë, Lezhë, të cilat janë përpunuar më pas me qëllim shitjen.
Ata janë zbuluar në kuadër të operacionit “Vakumi”, në muajin prill të këtij viti, ku u sekuestruan 3 thasë me rreth 34 kg cannabis.
Më 18 prill, Policia e Lezhës arrestoi në flagrancë tre persona, Gjovan Gjinin, Agustin Çotajn dhe Pashk Ndrecën, të kapur në dy sera me kanabis, ndërsa Magiljan Deda dhe një shtetas tjetër u shpallën në kërkim. Hetimet zbuluan gjithashtu lidhjen e tyre me David Ndoj dhe Mir Ndoj, të ndaluar një ditë më herët, më 17 prill, teksa transportonin rreth 34 kilogramë kanabis, i sekuestruar po në kuadër të këtij operacioni.
Megiljan Deda është arrestuar në Mal të Zi me qëllim ekstradimi në vendin tonë.
