Pamjet që shikoni në videon e mëposhtme janë nga sherri i regjistruar këtë të premte në Shkodër, në afërsi të shkollës së mesme “Shejnaze Juka”, ku mbetën të plagosur tre të mitur, dy prej të cilëve vëllezër.
Nga pamjet shihet se në sherr janë përfshirë një grup të rinjsh, ndërsa në një moment njeri prej tyre, nxjerr një thikë nga xhepi dhe godet bashkëmoshatarët.
Sipas Policisë, protagonist i sherrit ka qënë i riu me iniciale A.K, i cili kishte konflikt me dy vëllezërit F. Th. dhe K. Th, dhe si pasojë e përleshjes kanë mbetur të tre të plagosur.
Të plagosurit janë dërguar në spital, për mjekim, dhe raportohet se janë jashtë rrezikut për jetën. Ndërkohë janë gjetur edhe sendet personale të adoleshentëve të përfshirë në konflikt, ku në kapelën e njërit prej tyre duket mbishkrimi “Pain don’t hurt” (dhimbja nuk të vret).
Shkaqet që kanë çuar në sherr tre të rinjtë vijojnë të jenë mister, ndërkohë ky nuk është rasti i parë që të rinjtë konfliktohen me thikë në afërsi të ambjenteve të shkollës. Pak ditë më parë një tjetër i ri, Erjon Boba u vra me thikë nga bashkëmoshatari i tij në Durrës, duke ngritur shqetësime për sigurinë në ambjentet e institucioneve arsimore.
