Pas arrestimit të Dhimitër Mecit, 45 vjeç, në Greqi si pjesë e një grupi të dyshuar vrasësish me pagesë, Policia e Shtetit ka dalë me një njoftim zyrtar lidhur me kontrollet e zhvilluara në banesën e tij në Labovën e Kryqit, Gjirokastër.
Sipas policisë, gjatë operacionit të koduar “Provat”, në bashkëpunim me autoritetet greke, në banesën e Mecit u gjetën dhe u sekuestruan 3 armë zjarri automatike, 200 fishekë kallashnikovi, 18 pako me fishekë pistolete dhe 5 krehra.
Armët dhe municioni, që dyshohet se do të trafikohej drejt Greqisë, janë dërguar për ekspertizë në Institutin e Policisë Shkencore.
Sipas burimeve të hetimit grek, grupi ku bënte pjesë Meci përbëhej nga 4 shtetas shqiptarë dhe 4 grekë, të cilët planifikonin një atentat ndaj një mafiozi grek në zonën e Pireas, i njohur si ish-bashkëpunëtor i Mihalis Zampounit, i ekzekutuar më herët në një atentat mafioz.
Grupi dyshohet gjithashtu për disa ngjarje të tjera kriminale, përfshirë tentativën për vrasjen e Jani Lalës, djegien e një karburanti, si dhe vjedhjen e një automjeti më 22 korrik 2025, të cilit i kishin vendosur targa false për t’u përdorur në atentat.
Gjatë operacionit të zhvilluar dy ditë më parë në Greqi, u arrestuan:
Dhimitër (Dhimo) Meci, 45 vjeç, nga Labova e Poshtme, Gjirokastër,
Fatjon (Fatjion) Prendi, 39 vjeç, nga Lezha,
Andrea Brokeri, 32 vjeç, nga Himara,
ndërsa Vasil Theohari, 31 vjeç, nga Krongji i Finiqit, është shpallur në kërkim.
“Në kuadër të bashkëpunimit mes Policisë shqiptare dhe Policisë greke, pas shkëmbimit të informacionit për kapjen e disa shtetasve shqiptarë në Greqi, të dyshuar si vrasës me pagesë, strukturat e Policisë së Shtetit në Gjirokastër, Vlorë dhe Lezhë, në kuadër të operacionit policor të koduar “Provat”, zhvilluan kontrolle në banesat e këtyre shtetasve.
Si rezultat i kontrollit në fshatin Labovë e Kryqit, shërbimet e Drejtorisë Vendore të Policisë Gjirokastër gjetën të fshehura, në banesën e shtetasit Dh. M., 45 vjeç, 2 kallashnikovë dhe një armë zjarri automatike, të dyshuar të trafikuar dhe qindra fishekë të kalibrave të ndryshëm.
Armët e zjarrit, që u gjetën në banesën e 45-vjeçarit, i ndaluar 2 ditë më parë në Greqi, mbi akuza për vrasje dhe pjesëmarrje në grup kriminal që posedonte armë zjarri, do të dërgohen tek Instituti i Policisë Shkencore për ekspertim teknik.
Me qëllim dokumentimin e plotë të veprimtarisë kriminale të shtetasve shqiptarë Dh. M., 45 vjeç, banues në Labovën e Kryqit Gjirokastër; Andrea Brokeri, 32 vjeç, banues në Kudhës Himarë; Fatjon Prendi , 39 vjeç, banues në Lezhë; dhe Petro Theohari, 31 vjeç, banues në Muzinë Sarandë, të dyshuar si vrasës me pagesë, strukturat e Departamentit të Policisë Kriminale, ato të DVP Gjirokastër, Vlorë e Lezhë, në bashkëpunim me Prokurorinë, po vijojnë hetimet e thelluara duke koordinuar dhe bashkëpunuar ngushtësisht me homologët grekë.“, njofton policia.
LEXO EDHE:
U arrestua në Greqi si vrasës me pagesë, kontrolle në shtëpinë e Dhimitër Mecit. Çfarë u zbulua?
