Ish-shefja e politikës së jashtme të Bashkimit Europian, Federica Mogherini, është ndaluar nga policia belge në kuadër të një hetimi për mashtrim dhe korrupsion që lidhet me programin e trajnimit të diplomatëve të rinj të BE-së. Ngjarja ka tronditur opinionin publik dhe ka hedhur hije të rënda mbi Kolegjit e Evropës, institucioni prestigjioz që ajo drejtoi që prej vitit 2020.
Sipas mediave europiane, Mogherini u mor në pyetje për disa orë së bashku me zyrtarin e lartë të Komisionit Europian, Stefano Sannino, dhe një anëtar tjetër të stafit të kolegjit. Policia kontrolloi ambientet e Kolegjit të Evropës në Bryzh, selinë e Shërbimit të Veprimit të Jashtëm të BE-së dhe disa banesa private. Të tre janë hetuar për mashtrim me prokurimet, korrupsion dhe konflikt interesi, por deri tani asnjëri prej tyre nuk është akuzuar zyrtarisht.
Mogherini, 52 vjeç, që u bë e njohur si fytyra diplomatike e BE-së gjatë negociatave për marrëveshjen bërthamore me Iranin, pas largimit nga politika u bë rektore e Kolegjit të Evropës, një nga institucionet elitare që përgatit zyrtarët e ardhshëm të BE-së.
Nën drejtimin e saj, kolegji u zgjerua me një kampus të ri në Tiranë, hapur në bashkëpunim me kryeministrin Edi Rama dhe presidenten e Komisionit Europian, Ursula von der Leyen. Por mediat theksojnë se rreth Kolegjit dhe vetë Mogherinit kanë lindur prej kohësh polemika për mungesë transparence dhe lidhje të dyshimta politike.
Në artikullin e Euroactiv thuhet se Mogherini kishte ndërtuar imazhin e një drejtoreje moderne dhe energjike, por hetimi aktual për keqpërdorim fondesh të BE-së ka zbehur ndjeshëm profilin e saj publik.
Kolegji i Evropës konfirmoi kontrollet e Prokurorisë Evropiane në Bryzh, duke nënvizuar se “po merren të gjitha masat për të garantuar vijimin normal të aktivitetit”, por pa përmendur ndalimin e Mogherinit.
Rasti i saj pritet të ketë jehonë të gjerë në Bruksel dhe në qarqet akademike të BE-së, pasi instituti që ajo drejtonte konsiderohej prej dekadash si “shkolla e elitës evropiane”.
