Janë publikuar pamjet e momentit kur u ekzekutua biznesmeni 43-vjeçar Edmond Mëhalla, mbrëmjen e së dielës pranë karburantit të tij në lagjen “Emin Matraxhiu” të Elbasanit. Fotografia, publikuar nga Tv Klan, tregon autorin teksa qëllon me armë drejt automjetit Range Rover të viktimës.
Personi i dyshuar shfaqet me kapuç, me armën e drejtuar nga makina, ndërsa qëllon gjashtë herë. Dy plumba e goditën Mëhallën në kokë, ndërsa të tjerët në trup, duke i shkaktuar vdekjen e menjëhershme.
Jo shumë larg vendngjarjes u gjet edhe automjeti tip Audi me portobagazh, me të cilin autori kishte mbërritur dhe ishte larguar. Policia nuk ka arritur ende të identifikojë personin e kapur në kamerat e sigurisë.
Makina e djegur që u gjet në Mirakë të Librazhdit rezulton të jetë marrë në Tiranë një ditë para vrasjes.
Policia ka shpallur në kërkim Marsel Aranin, banues në Elbasan, dhe Armando Kolën nga Laçi, të dy të dyshuar për përfshirje në ekzekutim, ndërsa rolet e tyre nuk janë përcaktuar ende. Arani ndodhej në masë “arrest shtëpie” për një tjetër çështje penale.
Ndërkohë janë arrestuar:
Xhino Ago, 32 vjeç, ish-ortak i viktimës, i dyshuar se i ka dhënë makinën Marsel Aranit, automjet që dyshohet se u përdor në vrasje;
Kujtim Pisha, 52 vjeç, roje në karburantin e Mëhallës, i dyshuar për moskallëzim krimi.
Sipas hetimeve paraprake, pista kryesore lidhet me një konflikt mes dy ish-ortakëve, Edmond Mëhallës dhe Xhino Agës, i arrestuar tashmë nga policia.
