Deputeti demokrat, Gazmend Bardhi ka replikuar me deputetin socialist Ardit Bido në seancën e sotme plenare në Kuvend.
Ka qënë Bido ai i cili akuzoi fillimisht demokratët se kanë bojkotuar ceremoninë e ngritjes së Flamurit më 28 Nëntor, ndërsa në përgjigje Bardhi i thotë se flamuri nderohet duke mos vjedhur dhe duke mos duartrokitur një të pandehur, referuar rastit të Belinda Ballukut.
Replikat:
Bido: Është paudhësi, është paturpësi, është e paskrupullt që në ditën e ngritjes së flamurit, një formacion politik në kundërshtim me sa kërkojnë ndjekësit e asaj partie, të bojkotojnë flamurin. Unë e di që kur thoni të bojkotoni flamurin, e keni fjalën për Flamur tjetër. Të bojkotosh flamurin kombëtar është turp.
Bardhi: Besoj që duhet të dënoni gjuhën e përdorur, të gjithë biem dakord për të nderimin e flamurit kombëtar, nderimi real i festës së Pavarësisë dhe asnjë koleg nuk ka guxuar kurrë të përdorë një ditë që bashkon të gjithë shqiptarët, e të përcjellë përçarje. Do ta ftoja kolegun të nderonte flamurin jo vetëm më 28 Nëntor por çdo ditë. Flamuri nderohet duke mos vjedhur, ti duartroket vjedhjen dhe një të pandehur në qeveri. Ti voton për çdo projekt që nuk i shkon me garë të rregullt bizneseve shqiptare por grekut e turkut. Këtu tregoje ti patriotizmit e mos eja të na tregosh përralla.
