Sot është dita e fundit që partitë politike të njoftojnë Komisionin Qendror të Zgjedhjeve (KQZ) për pjesëmarrjen në zgjedhjet e parakohshme parlamentare të 28 dhjetorit, përmes koalicioneve. Afati ka nisur më 24 nëntor.
Deri dje në orën 13:00, KQZ ka pranuar njoftimin për formimin e dy koalicioneve:
PAI – PDAK – LPB, i përbërë nga Partia e Ashkalinjëve për Integrim, Partia Demokratike e Ashkanlive të Kosovës dhe Lëvizja për Bashkëveprim;
VAKAT, i përbërë nga Demokratska Stranka Bošnjaka, Bošnjačka Stranka Kosova dhe Demokratska tranka Vatan.
Sipas rregullave, një koalicion mund të formohet nga të paktën dy parti politike. Pas certifikimit, partitë nuk mund të tërhiqen dhe as të ndryshojnë koalicionin.
Ndërkohë, Partia e Drejtësisë ka njoftuar se do të garojë në një listë të përbashkët me Lidhjen Demokratike të Kosovës (LDK).
Në orët e mbetura deri në përfundimin e afatit, mbetet të shihet nëse do të ketë koalicione të tjera, apo në zgjedhjet e 28 dhjetorit qytetarët do të zgjedhin mes atyre që janë regjistruar deri tani.
