Problematikat në qarkun e Korçës janë shfaqur të shpërndara në disa bashki, me dëmtime që prekin argjinatura, rrugë rurale, sistemin e kullimit dhe furnizimin me energji në disa zona të izoluara.
Në Bashkinë Maliq, po punohet për mbylljen e çarjeve në argjinaturat e lumenjve Dunavec dhe Devoll, të cilat paraqesin rrezik për përmbytje të tjera.
Në Bashkinë Pogradec, përveç dëmeve në rrugët dhe pronat familjare, u evidentuan problematika serioze në pastrimin e pusetave dhe menaxhimin e rrjedhjeve të lumenjve, veçanërisht në zonat e Verdovës dhe Rëmenjit. Humbja e 50 metrave të korsisë së biçikletave përbën një tjetër tregues të erozionit të fortë.
Është verifikuar gjithashtu shkarje dherash pranë rezervuarit Stropskë 2, e cila po vlerësohet nga ekipet e emergjencave, duke ngritur shqetësime për sigurinë e rezervuarit.
Nga ana e furnizimit me energji, OSHEE raporton se Fideri 6 i Nënstacionit Mollas ka lënë pa energji 11 abonentë në zonën Kurtesh, ndërsa pjesa tjetër e fiderave funksionon normalisht.
Drejtoria Qendër–Lindje e ARRSH njofton se në aksin Qafë Plloçë – Qukës po vijojnë punimet për pastrimin e inerteve nga rruga, pasi reshjet kanë shkaktuar vështirësi në qarkullim.
Megjithë punën e strukturave në terren, shumë zona të qarkut Korçë vijojnë të përballen me dëmtime strukturore dhe problematika që po kërkojnë ndërhyrje të vazhdueshme dhe afatgjata.
