Kryetari i Partisë Demokratike, Sali Berisha, deklaroi se opozita nuk do të ndërpresë protestat deri në largimin e kryeministrit Edi Rama.
Në një intervistë për emisionin “Opinion”, Berisha tha se PD ka hyrë tashmë në një fazë të protestave të qëndrueshme, të cilat do të përshkallëzohen në ditët në vijim.
“Zgjedhjet u vodhën, absolutisht u rrëmbyen. Por nuk u mbrojtën dhe nuk damkosën siç e meritonin. Tani ka të drejtën kushtetuese të përballet me këtë regjim për rikthimin e votës së lirë.
Kjo protestë ndërpritet vetëm kur Edi Rama të largohet nga pushteti. Ky tip proteste do të jetë një tip foltore parlamentare qytetare.
Deputetët nuk lejohen të flasin në parlament, por do të flasin para kryeministrisë dhe qytetarëve, dhe qytetarët do të marrin pjesë aktivisht. Do të vazhdohet me përgatitjet e protestave të mëdha, të qëndrueshme.
Çdo demokrat duhet të jetë i përgatitur, kemi hyrë në stinën e protestave të pandërprera deri në përmbysjen e regjimit,” u shpreh Berisha.
