Ish- ministri dhe deputeti Genc Pollo ka reaguar pas një shkrimi të publikuar nga Albert Nikolla, ish-zëvendësministër në një nga qeveritë e Edi Ramës, i cili ka kritikuar mënyrën se si është hartuar ligji “Për barazinë gjinore”.
Në shkrimin e tij Nikolla ka bërë thirrje që ligji të kthehet për rishqyrtim në Kuvend, duke kërkuar që në të, të mbeten dispozitat që garantojnë barazinë mes burrave dhe grave, ndërsa çështjet që lidhen me orientimet seksuale apo konceptet multigjinore të trajtohen në një ligj të veçantë dhe të mos bazohen sipas tij në “ideologji neomarksiste”.
Lidhur me këtë, Pollo thotë se kjo është hera e parë që çahet uniteti i çeliktë rilindist në tema që janë objekt i kundërshtimit në debatin publik. Sipas tij kjo nuk ka ndodhur as në rastin e Veliajt apo Ballukut.
“Në shembull i mirëpritur i primatit të ndërgjegjes dhe kurajos civile”,- shkruan Pollo në fb.
Reagimi i plotë
Kritikë e studjuar dhe argumentative ndaj ligjit “Për barazinë gjinore” nga Albert Nikolla, ish zëvendësministër në qeverinë Rama dhe me poste në Partinë Socialiste. Ai bën thirrje që ligji të kthehet për rishqyrtim në Kuvend dhe nenet për barazinë burrë/grua të mbeten në ligji ndërsa pjesa për orientimet seksuale e multigjinorizmat të trajtohen në një ligj më vete por jo bazuar në ideologjitë neomarksiste si kësaj here.
Është e para herë që shoh që të çahet uniteti i çeliktë rilindist në tema që janë objekt i kundërshtimit në debatin publik. Kjo nuk ka ndodhur me skandalet e mëdha përfshi edhe këto të fundit si Veliaj e Balluku (nga anëtarët e partisë në pushtet asnjë thirrje për shpjegime, asnjë distancim apo kërkesë dorëheqjeje).
Shembull i mirëpritur i primatit të ndërgjegjes e i kurajos civile
