Reshjet e shiut të ditëve të fundit kanë mjaftuar që Bulqiza të përmbytet sërish. Rruga pranë terminalit është mbuluar plotësisht nga uji, duke e bërë të pamundur qarkullimin si për automjetet, ashtu edhe për këmbësorët.
Pamjet e shpërndara nga qytetarët tregojnë qartë se rruga kryesore është pushtuar nga uji, ndërsa askush nga autoritetet nuk është parë në terren për të menaxhuar situatën.
“Përshëndetje, sot në Bulqizë. Te terminali është përmbytur rruga, nuk kemi ku të kalojmë, as këmbësorët gjithashtu. Hapet sezoni i plazhit në Bulqizë në muajin nëntor,” shkruan një qytetar me ironi, duke shprehur zhgënjimin e plotë ndaj gjendjes absurde.
Banorët shprehen të revoltuar ndaj kryebashkiakes Mjeshtri dhe ndërmarrjes së Ujësjellës Kanalizimeve, të cilat sipas tyre vazhdojnë të mbyllin sytë përballë një problemi që përsëritet çdo vit.
Ndërkohë që investimet e bashkisë shkojnë kryesisht në fasada, kanalizimet nevoja më bazike për qytetin, mbeten të harruara. Në Bulqizë, mjafton pak shi që rrugët të kthehen në përrua dhe premtimet e bashkisë të mbyten bashkë me to.
