Pas deklaratave të kreut të Partisë Demokratike, Sali Berisha, Marta Kos, Komisionerja për Zgjerimin e Bashkimit Europian, tregoi edhe një herë zellin për të mbrojtur idetë e qeverisë së Edi Ramës.
Në një reagim përmes Twitter-it, ajo theksoi rëndësinë e barazisë gjinore dhe nënvizoi se respektimi i këtyre parimeve është thelbësor për integrimin e Shqipërisë në BE. Njëkohësisht, Kos doli në mbrojtje të ambasadorit të BE-së, Silvio Gonzato.
“Barazia gjinore dhe mosdiskriminimi janë pjesë integrale e ligjit të BE-së. Përputhja me këto parime është pjesë e procesit të pranimit në BE. Kjo nuk është një kërkesë private e Ambasadorit të @EUinAlbania. Çdo sulm ndaj tij është i papranueshëm,” shkruan Kos në një postim në “X”.
Reagimi i saj erdhi pas kritikave që Berisha drejtoi ndaj ambasadorit Gonzato nga Kuvendi, ku e akuzoi se po “imponon bindjet e tij personale” në lidhje me projektligjin për barazinë gjinore.
Kujtojmë se kryedemokrati Berisha foli dhe për ligjin për barazinë gjinore, duke thënë se ky është një moment i rëndësishëm për të nxjerrë në pah pasojat e rrezikshme që sjellin ligje të tilla. Sipas tij ky ligj nuk ka të bëjë me mbrojtjen e barazisë gjinore, por me një ideologji të rrezikshme që synon të përmbysë rendin natyror dhe themeloret e shoqërisë.
