Delegacioni i Bashkimit Evropian në Tiranë ka reaguar për “Euronews Albania” lidhur me mosbetimin nga presidenti të gjyqtarit të zgjedhur të Gjykatës Kushtetues, Asim Vokshi.
Ai është zgjedhur nga Gjykata e Lartë si institucion emertese, që prej 30 shtatorit por ende nuk është thirrur për betim, çka zyrtarizon dhe nisjen e detyrës si gjyqtar i Gjykatës Kushtetues.
Mosbetimi i tij vjen pasi Naureda Llagami, e renditur ndër më të vlerësuarat në garë, ka hedhur akuza serioze për manipulim të procesit në favor të Asim Vokshit, i cili mbështetet nga Sokol Sadushi.
Sipas rezultatit zyrtar, Llagami mori 8 vota, Asim Vokshi 6 dhe Florian Ballhysa asnjë. Një fletë u shpall e pavlefshme, çka bëri që asnjëri të mos siguronte shumicën prej 3/5. Për pasojë, fitues u shpall automatikisht Vokshi, i renditur i pari me 89.5 pikë, për të zëvendësuar Holta Zaçajn në Kushtetuese.
Delegacioni i BE në reagim thekson se nxisin institucionet të veprojnë menjëherë për të plotësuar pozicionin e lirë. Sipas tyre një zgjidhje e shpejtë dhe e drejtë e çështjes do të kontribuojë për forcimin e besimit të publikut.
“Delegacioni i BE-së në Shqipëri nënvizon rëndësinë e respektimit të procedurave ligjore, zgjidhjes të mosmarrëveshjeve me mjete ligjore dhe ruajtjes së besimit te sistemi gjyqësor i reformuar.
Pas propozimit të Këshillit të Emërimeve në Drejtësi për kandidatët për pozicionin e lirë në Gjykatën Kushtetuese, përzgjedhjes nga organi emërues – Gjykata e Lartë – dhe më pas apelimit, tani çështja është në fazën përfundimtare të shqyrtimit gjyqësor.
Autoriteti i institucioneve gjyqësore përcaktohet në Kushtetutë dhe gjithë individët kanë të drejtën e një shqyrtimi të drejtë ligjor përmes procedurave të duhura ligjore. Ne i nxisim të gjitha institucionet të veprojnë menjëherë për të plotësuar pozicionin e lirë. Një zgjidhje e shpejtë dhe e drejtë e çështjes kontribuon për forcimin e besimit të publikut,” shkruhet në reagim.
