Ish-presidenti francez Nicolas Sarkozy është urdhëruar që javën e ardhshme të shkojë në burgun e Parisit për të vuajtur dënimin 5-vjeçar për komplot kriminal për të marrë fonde për fushatën zgjedhore nga regjimi i diktatorit Muammar Gaddafi.
Sarkozy, i cili ka qenë president në vitet 2007-2012, u thirr të hënën për të takuar prokurorët e shtetit. Ata i thanë se duhet të prezantohet në burgun La Santé më 21 tetor për të nisur dënimin.
70-vjeçari do të jetë i pari udhëheqës francez i pasluftës dhe i pari nga një vend i Bashkimit Europian që dënohet me burg. Më parë, ai ka qenë i pari udhëheqës i Francës që duhet të mbante një gjurmues elektronik pasi është dënuar për një rast tjetër korrupsioni dhe ndikimi për favore nga një gjykatës. Asokohe u dënua me një vit burg, por e kreu dënimin duke mbajtur gjurmuesin në këmbë për tre muaj derisa iu dha lirimi me kusht.
Sarkozy e ka apeluar vendimin dhe pritet një gjyq i ri brenda gjashtë muajve. Por dënimi i tij përcakton se duhet të qëndrojë në burg derisa të nisë procesi i apelit.
Mediat kanë raportuar se javën e shkuar ai ka pritur 100 persona në një festë në Paris si për t;’u ndarë me ta para se të shkojë në burg. Le Figaro shkroi se u kishte thënë të ftuarve që ishte i pafajshëm. Sa për burgun, tha: “Nuk do të kërkoj favorizime. Kur ka diçka për të bërë, duhet ta çosh deri në fund.”
Sarkozy pritet të ketë qeli të veçuar, me një orë në ditë aktivitet fizik dhe tri vizita në javë. Me gjasë ai do të qëndrojë në një njësi të veçantë për të burgosurit e cenueshëm që disa e quajnë njësia VIP.
Pasi të hyjë në burg, Sarkozy ka të drejtë si çdo i burgosur që të apelojë vendimin e gjykatës. Ai do të qëndrojë derisa gjykatësit të japin vendimin e tyre dhe kjo mund të dojë rreth dy muaj.
