Gazetarja Anila Hoxha, e ftuar në emisionin “Top Story” për të diskutuar se kush do të jetë kreu i ri i SPAK, ka folur fillimisht për garën për drejtuesin e Byrosë Kombëtare të Hetimit.
Drejtuesi i ri i BKH-së duhej të ishte në krye të detyrës që më 1 shtator, por procesi është zvarritur. Sipas gazetares, gara ka kapërcyer çdo afat, por SPAK nuk i ka dorëzuar ende emrat tek Këshilli i Lartë i Prokurorisë, pasi do të jetë ky institucion që do të vensdosë më pas drejtuesin e ri të BKH-së.
“Në Prokurorinë e Posaçme ka dy zhvillime që presin drejtuesit. Drejtuesin e BKH, figurë që duhet të ishte në krye të detyrës më 1 shtator, por kjo nuk u bë e mundur për shkak të zvarritjes së procedurave.
Aktualisht po shqyrtohen nga Komisioni për Çështjen e Figurës dhe Pasurisë dhe emrat nuk janë kthyer ende pasi tre prokurorët e SPAK që do vendosin, që konsiderohen komision përzgjedhës, do propozojnë pranë KLP. Kjo e fundit vendos kush do jetë drejtori i BKH.
Gara ka kapërcyer çdo afat të mundshëm. BKH nuk e pati drejtuesin e dytë të vet brenda afateve. Jemi ende në pritje, proces që vazhdon të jetë në situatë verifikimi”, tha Hoxha.
Kujtojmë se kandidatët në garë janë: Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta.
Mediat kanë raportuar për një garë të paracaktuar, pasi dy kandidatët favoritë për të marrë postin e drejtuesit të BKH-së janë Joni Keta dhe Elton Kërluku, e cila ka sjellë edhe një përplasje mes Altin Dumanit dhe Arben Krajës.
Drejtueses aktuale të BKH-së, Aida Hajnajt, i përfundon mandati 5-vjeçar më 31 Gusht. Edhe pse kishte shprehur që më 28 mars interesin për një tjetër mandat, ajo u përjashtuar nga e drejta për rikandidim, pasi nuk dorëzoi dokumentacionin e kërkuar brenda afatit të caktuar nga Komisioni i Përzgjedhjes deri më 7 maj.
