Në Njësinë Administrative Bushat të Vaut të Dejës, Nik Jaha përballet me një problem të pazakontë, që nis pas një aksidenti në korrik 2024.
Dy muaj më vonë, banesa e personit, me të cilin u aksidentua, u sulmua me lëndë plasëse, dhe Nik Jaha u bë i dyshuar nga policia. Ai u shoqërua dhe iu sekuestrua telefoni.
Më pas telefoni i Nikut mbeti i bllokuar dhe ai nuk u kontaktua më nga policia apo prokuroria. Pas ankesave të shumta, në korrik 2025, Nik Jaha mori një urdhër për kthimin e telefonit.
Por kjo nuk ndodhi. Në Komisariatin e Vaut të Dejës i thanë, se punonjësi përgjegjës, Klaudio Dorti, nuk ishte më pjesë e komisariatit dhe se nuk kishte kush të kryente ekzekutimin e urdhrit.
Drejtoria Vendore e Policisë Shkodër konfirmoi se telefoni nuk ishte kthyer nga prokuroria në komisariat, duke penguar kthimin e sendit.
DVP Shkodër: Unë u lidha me një oficer të Vaut të Dejës dhe ishin në dijeni për këtë rastin, por kanë marrë vetëm urdhrin për kthimin e sendeve të sekuestruara, por nuk është objekti i sekuestruar, që është kthyer. Nuk ia ka kthyer Prokuroria, Komisariatit të Vaut të Dejës akoma telefonin. U lidha apostafat me oficerin dhe më tha, që ia kthen Prokuroria Komisariatit. Edhe në momentin, që do të kthehet, do ta ekzekutojnë, do ia japin telefonin.
Pas ndërhyrjes së emisionit “Stop”, u nxor një urdhër i ri ekzekutimi dhe brenda një dite, telefoni iu kthye Nik Jahës.
/Emisioni “Stop”
