Deputetja e Partisë Demokratike, Albana Vokshi, ka reaguar ndaj vendimit të Presidentit Bajram Begaj, për dekretimin e zgjedhjeve në Bashkinë e Tiranës.
E ftuar në Syri TV, Vokshi e cilësoi këtë akt si një shkelje flagrante të Kushtetutës dhe një dëshmi të kapjes totale të institucioneve nga Kryeministri Edi Rama.
Sipas saj, Presidenti duhej të kishte pritur vendimin e Gjykatës Kushtetuese përpara se të firmoste dekretin, duke respektuar rolin e saj si autoritet suprem për interpretimin e ligjshmërisë.
“Është absurde dhe e pakonceptueshme që një President të shkelë Kushtetutën në mënyrë kaq flagrante. Ky është një precedent që nuk ndodh as në vendet e rajonit,” deklaroi Vokshi.
Deputetja demokratike renditi një sërë rastesh që, sipas saj, dëshmojnë kapjen e institucioneve nga mazhoranca, përfshirë çështjen e Olta Xhaçkës dhe moszbatimin e vendimeve të Gjykatës Kushtetuese.
Ajo akuzoi Kryeministrin Rama për emërime të papërshtatshme në delegacione ndërkombëtare, pavarësisht vendimeve gjyqësore dhe rekomandimeve të Komisionit të Venecias.
“Rama nuk pyet më për institucionet. Ai vepron sipas qejfit, sfidon edhe Këshillin e Europës, edhe Parlamentin Europian. Presidenti duhej të kishte ruajtur dinjitetin e institucionit që përfaqëson, jo të firmoste çdo urdhër që i jepet nga Kryeministri,” tha Vokshi.
Në vijim të intervistës, ajo hodhi akuza të rënda për ndërhyrjen e grupeve kriminale në zgjedhjet e 11 majit, duke pretenduar se mbi 20 deputetë janë zgjedhur me ndikimin e bandave dhe nuk përfaqësojnë qytetarët, por interesat e krimit të organizuar.
“Shqipëria nuk pati zgjedhje të lira. Sot, edhe institucioni i Presidentit është 100% i kontrolluar. Rama është kthyer në një rrezik ndërkombëtar,” përfundoi Vokshi.
