Shkarkimi i Erion Veliajt nga detyra e kryetarit të Bashkisë së Tiranës do të jetë një ndër vendimet e para të Qeverisë “Rama 4”.
Qeveria e re u mblodh javën e kaluar, por më shumë ishte një mbledhje konstituimi pas betimit të ministrave në Presidencë, teksa vendimet e para do të merren në mbledhjen e nesërme (e enjte) të Këshillit të Ministrave, e cila pritet të mbahet në orën 12:00.
Qeveria mblidhet zakonisht të mërkurave, por për shkak të Kuvendit, mbledhja e sotme është shtyrë për ditën e nesërme. Një ndër vendimet që do të firmosë Qeveria është edhe propozimi i Këshillit Bashkiak të Tiranës, për shkarkimin e Erion Veliajt nga detyra.
Vendimi i Këshillit Bashkiak iu përcoll zyrtarisht ditën e sotme Këshillit të Ministrave përmes Prefektit të Tiranës.
Në vendimmarrje, Këshilli Bashkiak iu referua pikës c të nenit 62 të ligjit “Për vetëqeverisjen vendore” që thotë se kryetari i bashkisë shkarkohet me vendim të Këshillit të Ministrave kur propozohet për shkarkim nga këshilli bashkiak përkatës për mosparaqitje në detyrë për një periudhë 3-mujore të pandërprerë.
Propozimi për shkarkim u miratua në konsesus mes të gjitha palëve politike me 50 vota pro të këshilltarëve bashkiak, teksa pati debati nëse duhej thirrur Erion Veliaj në mbledhje për të bërë mbrojtjen e tij apo jo.
Nuk dihet nëse Edi Rama do e firmosë vetë shkarkimin nga detyra të Erion Veliajt, apo si në të gjitha vendimet do ja lerë zëvendëses së tij, Belinda Balluku, e cila është konsideruar si kundërshtarja e Veliajt brenda kampit socialist.
Pasi Qeveria të miratojë vendimin, Erion Veliaj ka të drejtë ta ankimojë shkarkimin në Gjykatën Kushtetuese brenda 15 ditësh, dhe në këtë rast vendimi i qeverisë do të pezullohej, deri në një vendimmarrje të gjykatës më të lartë në vend.
Në rast se ankimimi nuk ndodh, atëherë i hapet rrugë zgjedhjeve të reja, të cilat Presidenti i Republikës do të duhet t’i shpallë menjëherë sapo të informohet për vakancën.
Edi Rama i njoftoi zgjedhjet e parakohshme lokale për Bashkinë e Tiranës që në mbledhjen e Asamblesë së PS-së më 11 shtator, kur edhe i dha urdhrin Këshillit Bashkiak që të shkarkonte Erion Veliajt.
Në të njëjtën ditë, Rama bëri me dije se kandidatja e PS-së për Bashkinë e Tiranës do të jetë Ogerta Manastirliu. Kjo e fundit ka nisur prej kohësh punën për zgjedhjet për Bashkinë e Tiranës, pasi edhe në zgjedhjet parlamentare ishte drejtuese politike e Qarkut, një situatë krejt ndryshe qëndron në kampin opozitar.
Ndërkohë, ende nuk ka një vendim të Partisë Demokratike se cili do të jetë kandidati, teksa aktualisht po negocion me forcat e tjera opozitare për t’u futur bashkë në zgjedhje.
Zgjedhjet për Bashkinë e Tiranës pritet të mbahen në të njëjtën ditë me zgjedhjet e parakohshme për bashkinë e Matit, Tepelenës, Dibrës, Cërrikut dhe Vlorës, të cilat po ashtu janë pa kryebashkiakë, për shkak të dorëheqjeve për arsye të ndryshme.
