Edi Rama, gjatë fjalës së prezantimit të ministres së re të Punëve të Brendshme, Albana Koçiu, përmendi sërish katet pa leje të kullës “Syri i Tiranës”, e cila ndodhet vetëm rreth 300 metra larg Bashkisë.
E ndërtuar nga kompania “Ideal Construction” me pronar Armand Lilo, Rama tha se ka 4-5 kate pa leje, që për vite nuk ishin konstatuar nga inspektorët. Sipas tij, praktikat e deritanishme do të marrin fund dhe çdo ndërtim jashtë ligjit do të konfiskohet nga shteti, pavarësisht kush qëndron pas tij.
“Sikur të mblidheshin gjithë fshatarët që policia u ka vënë gjoba për një avlli, do të bëhej mitingu më i madh pas atij të Zhou Enlait. Ndërkohë, në mes të Tiranës, Syri i Tiranës ka 4-5 kate pa leje. Mesazhi është i qartë: sado të madh ta kesh emrin në ndërtim, shteti është më i madh se ti dhe nuk e gëzon dot ndërtimin pa leje,” – deklaroi Rama.
Kryeministri e krahasoi me shembullin e një 90-vjeçari, i cili përfundoi në prokurori dhe gjykatë si ndërtues pa leje për një riparim në zonën e Dajtit, për të treguar se çfarë ndodh me qytetarët e thjeshtë.
“Deri dje, i shikonin vetëm avllitë, një burrë 90 vjeç përfundoi në gjykatë si ndërtues pa leje për një riparim matanë Dajtit. Sesi e gjeti policia këtë kriminel në një vrimë matanë Dajtit, do ishte për medalje ari nëse do të kishte mbetur vetëm ajo e atij.” – tha Rama.
LEXO EDHE:
Kate pa leje në qendër të Tiranës, kompania e Armand Lilos e pandehur në Gjykatë
