Bashkimi Evropian ka propozuar përshpejtimin e heqjes graduale të importeve të energjisë dhe mallrave ruse, në kuadër të sanksioneve ndaj Moskës për shkak të luftës në Ukrainë.
Presidentja e Komisionit Evropian, Ursula von der Leyen, deklaroi pas një bisede me presidentin amerikan Donald Trump se BE-ja synon të ulë më shpejt varësinë nga karburantet fosile ruse.
Nga ana tjetër, zëdhënësi i Kremlinit, Dmitry Peskov, reagoi duke thënë se këto masa nuk do të ndikojnë në politikën e Rusisë.
“Vendet evropiane gabimisht besojnë se vazhdimi i politikës së sanksioneve është i aftë të ndikojë në qëndrimin e Federatës Ruse. Rusia, e cila mbron interesat e saj kombëtare, sigurisht që nuk preket nga këto sanksione. Tre vitet e fundit e kanë treguar këtë”, tha Peskov.
Ekonomia ruse ka treguar rezistencë ndaj sanksioneve perëndimore, ndonëse përballet me inflacion të lartë dhe deficit buxhetor në rritje, për shkak edhe të shpenzimeve të mëdha ushtarake.
Pavarësisht masave ndëshkuese, BE ende importon mallra me vlerë miliarda euro nga Rusia, përfshirë gaz natyror të lëngshëm dhe uranium të pasuruar, megjithëse importet e naftës dhe gazit rus janë ulur ndjeshëm që prej nisjes së luftës.
