Ish-ndihmëssekretari amerikan i Shtetit, James Rubin, deklaroi në Dhomat e Specializuara në Hagë se shqiptarët e Kosovës vriteshin nga forcat serbe vetëm për shkak të etnisë së tyre. Gjatë dëshmisë, Rubin theksoi se politika e SHBA në atë periudhë synonte të parandalonte përsëritjen e krizës së Bosnjës dhe të mbrohej popullsia civile.
“Na shqetësonin shumë raportet që merrnim: familje që digjeshin, që vriteshin thjesht sepse ishin shqiptarë të Kosovës. Kjo filloi të ngjasonte me krizën e Bosnjës, ku njerëz u masakruan vetëm për shkak të etnisë,” tha Rubin para trupit gjykues. Ai shtoi se qëllimi kryesor i SHBA ishte të veprohej në mbrojtje të viktimave dhe të parandaloheshin krime të mëtejshme ndaj civilëve.
Rubin gjithashtu u pyet nga avokati i Kadri Veselit, Rodney Dixon, mbi ndërhyrjen ndërkombëtare në Kosovë. Ai deklaroi se SHBA donte të siguronte që viktimat të ishin të mbrojtura dhe të mos përfshiheshin në operacione ushtarake pa rrezik për civilët.
Avokati i ish-presidentit të Kosovës, Hashim Thaçi, Luka Misetiç, e pyeti Rubin nëse sekretarja amerikane e atëhershme, Madeleine Albright, i kishte thënë Thaçit se do të mbante përgjegjësi për krimet që mund të kryheshin pas hyrjes së KFOR-it. Rubin tha se nuk i kujtohet një deklaratë të tillë, por theksoi se Albright i kishte kërkuar Thaçit të tregonte tolerancë ndaj popullsisë.
