Gazetari Bledian Koka ka folur për deklaratën e bërë sot nga e ngarkuara me punë e ambasadës amerikane në Tiranë, Nensi Van Horn, në lidhje me luftën e karteleve të drogës në rajonin e Ballkanit.
Sipas Kokës, kjo deklaratë ‘është një skaner i jashtëzakonshëm i rrezikut dhe asaj që Shqipëria ka përfunduar sot, për shkak të angazhimit të bandave kriminale në trafikun ndërkombëtar të drogës’.
Gjithashtu Koka duke folur në Syri Tv, theksoi se ‘përfshirja e bandave kriminale në Shqipëri, jo vetëm për trafikun ndërkombëtar të drogës por edhe për paratë që pastrohen me kullat që ndërtohen në Tiranë, për angazhimin e këtyre bandave në zgjedhje dhe kanë përfaqësuesit e tyre të lartë edhe në polici edhe në prokurori tashmë edhe në parlament, i gjithë ky lloj skaneri ka emër dhe ai quhet Edi Rama’.
Intervista në studio:
Koka: Deklarata e sotme e të ngarkuarës me punë e ambasadës amerikane në Tiranë, Nensi Van Horn, është një skaner i jashtëzakonshëm i rrezikut dhe asaj që Shqipëria ka përfunduar sot, për shkak të angazhimit të bandave kriminale në trafikun ndërkombëtar të drogës. Zonja Van Horn flet në këtë deklaratë për sigurinë kombëtare të ShBA që po cenohet nga ky trafik i madh i drogës dhe e barazon sigurinë kombëtare të ShBA me rrezikun që ndodh në Ballkan dhe specifikisht në Shqipëri.
Ferko: Bashkëpunimi me qeveritë me ato që e kanë seriozisht luftën kundër këtyre karteleve, pse nuk lidhet me bashkëpunimin me qeverinë shqiptare?
Koka: Janë 3 elementë kryesorë që duhen veçuar nga deklarata e Van Horn. Elementi i parë ishte që duke cituar deklaratën e presidentit Trump dhe kërkesën për të luftuar bandat kriminale të trafikut ndërkombëtar të drogës, vihet te theksi se si ky aktivitet cenon sigurinë kombëtare të SHBA.
Në të njëjtin paragraf thotë se këto banda kriminale që janë edhe nga rajoni dhe sigurisht edhe nga Shqipëria, këto banda arrijnë të kryejnë këtë veprimtari kriminale dhe të pastrojnë paratë që ndodh në rajon dhe ky rajon përfshin edhe Shqipërinë dhe sigurinë kombëtare të Shqipërisë.
Dallimi kryesor i kësaj deklarate qëndron te fjalia dhe pjesa ku thotë që ne jemi interesuar të bashkëpunojmë me ato qeveri që përfaqësojnë vullnetin dhe vizionin e presidentit Trump për të luftuar totalisht bandat kriminale të trafikut ndërkombëtar të drogës dhe jemi të interesuar të bashkëpunojmë me qeveri që e përqafojnë këtë lloj vizioni.
Qartazi thuhet në këto rreshta që ShBA e ka kuptuar se ka disa qeveri që janë të interesuar për të bashkëpunuar në këtë betejë, ka dhe ca qeveri që e përdorin si propagandë.
Nga e gjitha ajo që kemi raportuar dhe ka denoncuar opozita shqiptare, për përfshirjen e bandave kriminale në Shqipëri, jo vetëm për trafikun ndërkombëtar të drogës por edhe për paratë që pastrohen me kullat që ndërtohen në Tiranë, për angazhimin e këtyre bandave në zgjedhje dhe kanë përfaqësuesit e tyre të lartë edhe në polici edhe në prokurori tashmë edhe në parlament. Gjithë ky lloj skaneri ka emër dhe ai quhet Edi Rama.
