Erogen Brajoviç, i plagosur në atentatin e ndodhur një ditë më parë në qendër të Shkodrës, ka reaguar nga spitali i Traumës në Tiranë, ku ndodhet i shtruar pas marrjes së tre plumbave.
Në deklaratën e tij, Brajoviç tha se ishte duke pirë kafe me dy miqtë e tij kur u qëllua me armë. Ai shprehu ngushëllime për viktimat, Armando Palin dhe Liridon Krajën, si dhe për familjet e tyre. Po ashtu, uroi shërim të shpejtë për kamarieren 25-vjeçare, Meri Kaceri, e cila mbeti e plagosur gjatë sulmit.
“Dora e pabesisë na shkëputi nga jeta dy qytetarë model. Dhimbja për mua është e rëndë dhe plagë që nuk mbyllet. Shpresoj që autortetet të zbardhin sa më shpejt motivet e këtij akti tragjik,” – tha ai.
Brajoviç mohoi çdo lidhje me grupe kriminale, duke u shprehur se është sipërmarrës dhe ka qenë i angazhuar në sport e jetën publike në Shkodër.
Si ndodhi ngjarja
Atentati u krye në një lokal pranë Bashkisë së Shkodrës, ku Ragip Gila hapi zjarr ndaj tavolinës ku ndodhej Brajoviç. Shënjestër dyshohet të ketë qenë pikërisht ai, por nga breshëria e plumbave humbën jetën Armando Pali dhe Liridon Kraja, truproja i tij. Ky i fundit ndërroi jetë në spital si pasojë e plagëve të marra.
Autori i dyshuar, Ragip Gila, është ndaluar nga policia dhe po hetohen motivet e ngjarjes.
Reagimi i Plotë:
Unë Erogen Millan Vaso (Brajovic) e bej kete reagim per mediat dhe opinionin publik. Ne keto momente te veshtira jo vetem per mua i shpreh ngushellimet e ndjera familjareve te 2 miqve te mi qe ishim sebashku sot ne mengjes ne nje kafe ne qender te Shkodres.
Ata ishin qytetare model te Shkodres, familjare te respektuar nga gjithe komuniteti. Dora e pabesise te nje vrasesi i shkeputi sot nga jeta teksa ishim sebashku dhe per mua personalisht eshte dhimbje e rende dhe plage qe nuk mbyllet! Kjofshin ne paqe me zotin Armando dhe Geridoni! Zoti ju dhente force familjeve te tyre! Gjithashtu i uroj sherim te shpejte vajzes te plagosur ne kete ngjarje. Distancohem plotesisht nga informacione qe lidhin personin tim me emra dhe grupe te caktuara ne Shkoder. Jam sipermarres ne disa biznese, nje pjese trasheguar nga babai im gjithashtu ai sipermarres deri ne fund te jetes, ish-futbollist i Shkodres dhe kombetares shqiptare.
Une kam qene per shkak edhe te tradites familjare, ish-futbollist i ekipit te Vllaznise, ish-President i klubit te futbollit Terbuni te Pukes. Familja ime ka patur nje histori persekutimi politik para viteve ‘90, por dhe vite me pas per shkak se ka perfaqesuar komunitetin malazez ne Qarkun e Shkodres. Per interesa te ketij komuniteti dhe Shkodres kam sherbyer me korrektesi per disa vite anetar i keshillit bashkiak te qytetit tim ashtu sikurse kishte sherbyer njeri prej miqve te mi te afert qe humbi jeten sot. Jam informuar ne spital qe autori eshte ndaluar dhe shpresoj te zbardhen sa me shpejt motivet e ketij akti te rende tragjik! Sa per lidhje te tjera qe aludohen ne media sqaroj se duhen lene institucionet e ligjit te trajtojne keto ceshtje!
