Bashkimi Europian ka vendosur një gjobë prej 2.95 miliardë eurosh ndaj Google, duke e akuzuar kompaninë për shkelje të rregullave të konkurrencës në fushën e reklamimit dixhital. Sipas Komisionit Europian, Google ka favorizuar shërbimet e veta në dëm të konkurrentëve të saj, duke krijuar avantazhe të padrejta në tregun europian të reklamave online.
Ky është rasti i katërt që Google gjobitet për praktika të ngjashme, ndërsa Komisioni Europian ka hequr dorë nga kërcënimet për ndarje të kompanisë. Përveç gjobës, Google duhet të ndërpresë praktikat e “vetë-preferencimit” dhe të eliminojë konfliktet e interesit në zinxhirin e reklamimit dixhital (adtech).
Google reagoi duke e quajtur vendimin “të gabuar” dhe njoftoi se do ta apelojë gjobën. Li-An Malahant, drejtuese e çështjeve rregullatore në Google, tha se gjoba do të dëmtojë mijëra biznese europiane, duke e bërë më të vështirë për to të gjenerojnë të ardhura.
Kronologjia e gjobave të BE ndaj Google:
2017 – Google Shopping: 2.42 miliardë euro për abuzim me pozicionin dominues në motorin e kërkimit.
2018 – Android: 4.34 miliardë euro për imponim kushtesh të paligjshme ndaj prodhuesve të telefonave.
2019 – AdSense: 1.49 miliardë euro për kufizime në kontratat e reklamimit.
2025 – AdTech: 2.95 miliardë euro për vetë-preferencim në shërbimet e reklamimit dixhital dhe konflikte interesi në zinxhirin e teknologjisë së reklamës.
