Një rast tronditës vjen nga Kavaja në emisionin “Stop”. Babai i tre fëmijëve është i shqetësuar se vajza e vogël, e cila qëndron me nënën, Marsidën, detyrohet të lypë rrugëve. Ai tregoi se i ka gjetur fëmijët të pistë, të paushqyer dhe i mori dy djemtë për t’i mbajtur, por jo vajzën.
Në videot e siguruara nga “Stop”, nëna shihet duke konsumuar lëndë narkotike dhe ndodhet në prani të të panjohurve. Edhe dy djemtë u shprehën para mikrofonit se “mami ka shumë shokë”.
Biseda e të infiltruarit të “Stop” me Marsidën ishte një konfirmim i mëtejshëm se duke qenë pa asnjë të ardhur, ajo kërkon para prej të panjohurve duke ofruar shërbime seksuale në këmbim. Pas bisedës, ajo la një takim me të.
Marsida: E çon dot p.sh mua, mamin dhe gocën deri në Golem? Këto të rrinë atje në plazh, ne të ikim, se kjo do të ikë në det, goca ime. Ne do të ikim për plazh, dalim pastaj ne bashkë, kur të arrijmë në Golem. I lëmë mamin e gocën te rotonda dhe ato ikin në plazh dhe ne dalim.
Në vend të personit që ajo priste të takonte, u paraqit gazetarja e emisionit dhe Marsida mohoi gjithçka.
Për situatën e fëmijëve të zonjës që i nxjerr të kërkojnë lëmoshë rrugëve dhe vetë është përdoruese e lëndëve narkotike, emisioni “Stop” shkon në zyrat e Shërbimit Social, bashkia Kavajë. Punonjëset thonë se kjo situatë është monitoruar, por nuk kanë bërë as raport për shëndetin mendor të zonjës në fjalë e as analiza për konsum droge. Sipas tyre, gruaja është e përgjegjshme dhe e aftë të rrisë fëmijët.
Punonjësja e Shërbimit Social: Edhe deri tani në këto momente, që ti je shfaqur në zyrën tonë, ne jemi duke u marrë. Jo më larg se ditën e premte, zonja bashkë me zotërinë kanë qenë të pranishëm në zyrën tonë. Para disa kohësh, ne prapë iu kemi bërë vizita në shtëpi edhe zotërisë, edhe zonjës.
Gazetarja: A është konsumatore?
Punonjësja e Shërbimit Social: Marsida thotë që unë nuk mundem t’i bëj.
Gazetarja: Nuk pranon të bëjë analizat e drogës?
Punonjësja e Shërbimit Social: Po!
Gazetarja: I është bërë një raport psiko-social Marsidës për të parë aftësitë e saj?
Përgjegjësja: …S’e di për…
Gazetarja: A mundet të bëni një vlerësim të shëndetit mendor nga specialistët, ta çoni për vlerësim?
Punonjësja e Shërbimit Social: Jo, ne vlerësimin nuk e kemi bërë sepse nuk na është dukur… Marsida është shumë mirë.., mund të bëjë ato veprimet e veta, ndoshta për vetëmbrojtje. Nuk mendoj që është me probleme mendore.
Gazetarja: A janë të sigurt djemtë me babain?
Punonjësja e Shërbimit Social: Ata ashtu duan, përderisa babai ua plotëson të gjitha.
Gazetarja: A është e sigurt vajza me nënën?
Punonjësja e Shërbimit Social: Tani, përderisa ajo po e mban vajzën, mendoj se po.
Psikologia Gejsi Anamali pasi u njoh me rastin, u shpreh se analizat nuk janë me dëshirë, por duhet të bëhen me detyrim dhe të dy prindërit duhet t’i nënshtrohen një vlerësimi. Gjatë kësaj kohe, fëmijët duhet t’i marrë shteti për strehim e mbrojtje. Sipas psikologes, këto situata janë kambana alarmi që duhet të na ndërgjegjësojnë që të mos kemi ngjarje më të rënda dhe fëmijë me devijanca.
